შინაგან საქმეთა სამინისტროს დაცვის პოლიციის დეპარტამენტის თავმჯდომარემ, გიორგი ბაგრატიონმა მოადგილეებთან და თბილისის სამმართველოს ხელმძღვანელთან ერთად, კორონავირუსის საკარანტინო ზონები მოინახულა.
მთელი საქართველოს მასშტაბით, აღნიშნულ ზონებში მოქალაქეთა უსაფრთხოებას და საზოგადოებრივ წესრიგს დაცვის პოლიცია იცავს. გიორგი ბაგრატიონი დაცვის პოლიციის თანამშრომლებს პირადად შეხვდა, ადგილზე არსებულ ვითარებას და მათ სამუშაო პროცესს დეტალურად გაეცნო.
დაცვის პოლიციის დეპარტამენტის თავმჯდომარე, ასევე, ეწვია რიჩარდ ლუგარის სახელობის საზოგადოებრივი ჯანდაცვის კვლევით ცენტრს და თბილისის საერთაშორისო აეროპორტს. გიორგი ბაგრატიონი ადგილზე მყოფ თანამშრომლებს გაესაუბრა. დეპარტამენტის თავმჯდომარემ მათ რისკის შემცველ ობიექტებზე ეფექტიანი მუშაობისთვის მადლობა გადაუხადა და წარმატება უსურვა.
